اسف انا في جيتي لك تسرعت..
ظنيت الاقي فيك شي فقدته..
كنت احسبك مجروح مثلي تولعت..
جربت فرقى شخص قبلك وهبته ..
كنت احسبك من مر جرحك تجرعت..
حبيت فيك احساس طفل لمحته..
لو قلت آآآه بوسط روحي توجعت..
ولو شفت دمعاتك شعوري سكبته..
ولو تطلب عيوني ابد ما تمنعت..
وأعطيك قلبي لو بعد ما طلبته..
وصلت بك اعلى مكان وتربعت ..
وفي قلب غيري يالغضي ما وصلته..
وأصبر على صدك واشوفك تدلعت..
وأعطيك ود وما أظنك حسبته..
أذهلتني بطباعك اللي تطبعت..
حتى قصيدي فيك ابد ما فهمته..
لو كان غايتك حروفي فأنا بعت..
وإفرح بجرح الشاعر الي جرحته..
وأرجوك من صدك تراني تشبعت..
خلك مع الي عاجبك أو عجبته..
يكفي قهر في جيتي لك تواضعت..
تركت غيرك لجل عينك وبعته..
ياليتني عن حب مثلك ترفعت..
ياليت قلبي قبل أعرفك دفنته..
لكن أببعد دامني بك توهقت ..
الله يرحم حبنا اللي ذبحته..
أنا شريت الود والحين انا بعت..
وأنا عطيتك قلبي اللي قهرته..
في يوم جيتك اطلبك ود وأقنعت..
نفسي بأنك شخص عادي عرفته..
كمل حياتك مثل ما انا توقعت..
تبقى اسير الماضي الي فرضته..
ولا يحزنك اني غلطان وتراجعت..
حولك بدالي الف شخص عجبته..
أما انا لا يمكن اخضع ولا طعت..
يحرم علي أعطيك قلب خذلته..
بأريحك من شوفتي يوم قاطعت..
أسلوبك اللي به تجامل كرهته..
غلطان يالمقفي انا ما تتبعت..
غيري يتابع خطوتي ما تبعته..
ما ينحني راسي لو اني تقطعت..
وماهو انا من لا رميته لقطته..
وان كان غرك حكي عذالي وطعت..
الله يعلم كيف قلبي وسكنته..
اللي ملأ قلبك علي وتسمعت..
خله يعوض شخص مثلي خسرته..
أنا بما فيه الكفايه تولعت..
واللي بقى من قلب فيني حرقته..
بأول لقا سلمته احساسي وضعت..
غلطت حياتي يوم قلبي سلبته..
وأستسمحك فالبعد كاني تراجعت..
ما عاد ابلقى فيك شي فقدته..
طبعك مثل غيرك وطبعي كما كنت..
أحب شخص ولا من تركته . تركته..
وان شفتني صدفه بعينك تطلعت..
ذكرتني بإنسان غالي فقدته..
